Aktiviteten i skøytegruppa på Gol er stor.
Forholda på Glitre Stadion er perfekte, og tilgangen til foreldre,
ungar og utstyr er god. I vinter er det difor rekordmange som har
det ”Gøy på Isen”.
Skøyteisen på Glitre vart opna rekordtidleg i november og har stått
i mot alle iherdige forsøk på å smelte bort i dei mange
varmeperiodane
Vi har sakna snøen, og i mangel på snøkantar måtte
vi flytte KM til fylkesanlegget på Furumo der arrangementet vart
prikkfritt avvikla 30.12. Men så kom snøen på nyttårsafta. Siste
dagane har det ”lava ned” og Glitre framstår no som eit reint
eventyrland med sitt flotte anlegg med hurtigløpsbane, brøyta og
islagt indre bane, og ”veslebanen” rundt vestre sving. Ta turen til
Glitre; sjå sjølv !
Skøytegruppa har saman med to av sponsorane våre;
Eidsgaard Hotell og Pers Hotell, kjøpt inn mykje skøyteutstyr, og
gruppa har denne sesongen leigd ut ca 45 par skøyter i ulike
storleikar. Resultatet er at vi aldri har hatt så mange vaksne med
skøyter på beina før!
Aktiviteten i gruppa er stor. Nisseløpet før jul
og familiedagen den 7.1. drog 80-90 frammøtte. Skøyteskulen har over
100 registrerte deltakarar så langt i sesongen, og vi slår nok
rekorden frå i fjor (ca 120). Skulane og barnehagane brukar Glitre
flittig, og med tilgang til nytt skøyteutstyr og nyslipt utstyr bør
opplevinga verte endå betre.
Vi registrerer gjester frå fjern og nær. Skøyteentusiastar frå
Lærdal kjem her ofte og trenar, og vi finn løpararar frå
nabobygdene; i sær Hemsedal og Ål.
Skøytegruppa arbeider med fleire prosjekt:
Fellestrening Gol – Hol vil gje resultat både på kort og lang sikt.
Det same gjeld felles barmarkstrening mellom vinteridrettar i Gol.
Prosjektet Barn- ungdom på is kan de finne meir informasjon om på
idrettslaget si nettside. Dette er eit spennande prosjekt som vert
støtta av fleire: NSF, Buskerud Skøytekrets, Idrettslaget/ Buskerud
Idrettskrets, Friskliv/ il@skulen, Gol Kommune. Ideen er henta frå
Aktiv SK i Oslo og skøytegruppa på Gol vidareutviklar modellen og
tilpassar den til våre lokale forhold. Sjå for øvrig Henning
Hagelund sitt debattinnlegg på NSFs nettside 12.01.07 ”Konkrete
forslag”.
Skøytesporten i Hallingdal er i støtet både
nasjonalt og internasjonalt. Vi kjenner til at Radio Hallingdal har
planar om direkte radiooverføring frå VM junior i Innsbruck i
samband med vår eigen Hallingdals- karusell i februar. To spennande
arrangement og ei artig oppleving med skøytesending ”live” på radio
med ein halling i fremste rekkje.
Skøytegruppa på Gol søkjer NSF om norgescup og NM
dei komande sesongane.
Jau, så menn. Vi er på glattisen. Og der er det
moro å vere ! |
