|
Talentar frå Austevoll Skeiseklubb
og Bergen Skøyte Klubb har hatt treningssamling på den nye bana i
Nordheimsund. (Foto: Thony Hannevig)
To gonger har opninga av rulleskeisebana i Norheimsund regna bort.
Men ho er klar til bruk. Me er interesserte i at flest mogleg nyttar
bana, seier Brunjulf Måkestad i Hardanger Skøyteklubb. To gonger
har han utlyst og to gonger har han avlyst opningsmarkeringa av
rulleskeisebana mellom Norheimsund kyrkje og grusbana. Årsaka er både
enkel og typisk for hausten: regn i bøtter og spann.
Då vert asfalten så
glatt at det er fårleg å skipa til konkurranse på han, seier Måkestad.
Utset opninga Han satsar ikkje på at alle gode ting er tre. I staden
utset han opninga til våren og vonar på blide vêrgudar som gler seg til
sommaren. Då har det gått nesten eit år sidan bana var klar. Planen var
å opna bana med fart og spaning. Dei beste skeiselauparane i regionen
skulle pila i ring på rulleskeiser. Men i helgene som kjem er dei
opptekne. Då er det betre å venta til etter vinteren, meiner Måkestad.
Han vonar å få landslagslauparar, som til dømes Eskil Ervik og Lasse
Sætre, til å delta i opninga.
Måkestad understrekar at
det er fritt fram for å bruka bana i haust og vinter. Men fyrst til
våren vert det faste treningar med instruktørar. Skøyteklubben ynskjer å
kjøpa rulleskeiser som kan leigast ut. Dessutan er vona at skulane vil
bruka den vel 150 meter lange bana flittig. Bana ligg fint til og er
av ypparleg kvalitet. Me vonar ho vil gje god rekruttering til
skeisesporten, seier Måkestad. Han seier skeiselauparane trenar meir og
meir på rulleskeiser. Sjølv om underlaget er ulikt og skøytebladet bytt
ut med hjul, er det meste likt. Trening av balanse og teknikk kan ein
like gjerna gjera på asfalt som på is. Komande sesong skal det til og
med skipast til noregscup på rulleskeiser. Måkestad vonar ei tevling kan
haldast i Norheimsund.
Ta omsyn
Men ikkje alle fartøy med hjul er velkomne. Bilar og andre tunge
køyretøy bør halda seg borte frå bana. Slitasjen på asfalten er stor,
spesielt om bilane har piggdekk. Dessutan dreg dei med seg småstein inn
på bana. Steinen er fårleg for dei som går, seier Måkestad.
Han opplyser at avtalen er at bana skal vera open for parkering når det
er spesielle tilskipingar i kyrkja. Idrettslaget skal syta for eiga
parkering. Til kvardags bør folk parkera utanfor dei gule stripene, i
retning kyrkja, seier Måkestad. Bana kostar nokre hundre tusen kroner,
men er godkjend som nærmiljøanlegg. Det utløyste om lag 200.000 kroner
frå spelepotten. |
