Debatt
Flott idrett og gjentekne slengmarknader
Av Reidar Furelid | 2012-03-04
Eg er rimeleg oppteken av skøytesporten og freistar få med
meg det meste av det beste på fronten. Er rimeleg positivt overraska over
sendetida NRK (TV) har gjeve dei siste åra! Ved høve tek nokre ihuga strilar
frå bygdene her – nord for Bergen – og tur til Vikingskipet.
Så er det diverre å oppleva ein del vi skulle lika ikkje å oppleva: Negativ
omtale av Peter Mueller og dei han har trenaransvar for. Kor ofte må Ove
Eriksen gjenta slengmerknadene om trenar Mueller og prestasjonane til Håvard
Bøkko, m.fl? Og diverre er Even Wetten med på notane. Heldigvis ser eg av
detbattinnlegg at det ikkje berre er eg som reagerer på dette!
Skøytesporten får ingen framgang av slik negativ omtale av lag og trenar. Eg
meiner beint ut sagt at vi som er positivt interesserte i sporten og gjer
vårt beste for å følgja med, burde vera forskåna frå slikt! Forlengst burde
NRK og Ove Eriksen ha fått med seg at det slett ikkje vert sett pris på
slike negative kommentarar vi får servert. Omatt og omatt.
Det er ikkje lett å kommentara sport med mange "forståsegpåarar" som
kritiske mottakarar, men det bør vera eit tilbakemeldingssystem som leverer
signal om kor det vert opplevd! Og ein burde merka det ved endring!
Kort sagt: La skøytesporten verta kommentert med innleving i det som
verkeleg skjer på bana. Flett inn god historiekunnskap og gjer det
interessant å følgja med. Vis positiv interesse for det som går føre seg på
og ved bana. Det er ikkje berre sporten som treng fornying, som det vert
terpa på. Det er og naudsynt at alle som vil formidla sporten tenkjer
positivt. Og mykje positivt er det å ta med! Og heldigvis er det slik at det
no er mange nasjonar som har gode utøvarar. Vi må vel innsjå at dei nordiske
landa har relativt få å ta av til rekruttering. Likevel greier både Noreg og
Finland å ha utøvarar i verdsklasse!
Den som skriv dette, sto på Bislett under EM i 1962! Og eg gløymer aldri då
klassen min skuffa læraren vår ved å klappa i hendene, då ein ung russar
fall på 500 m i Cortina-OL og bronsen dermed gjekk til Alf Gjestvang!
Lukke til med positiv interesse!
|
